1. อุมาปุปฺผิยตฺเถรอปทานํ
[1]
‘‘สมาหิตํ สมาปนฺนํ, สิทฺธตฺถมปราชิตํ;
สมาธินา อุปวิฏฺฐํ, อทฺทสาหํ นรุตฺตมํฯ
[2]
‘‘อุมาปุปฺผํ คเหตฺวาน, พุทฺธสฺส อภิโรปยิํ;
สพฺพปุปฺผา เอกสีสา, อุทฺธํวณฺฏา อโธมุขาฯ
[3]
‘‘สุจิตฺตา วิย ติฏฺฐนฺเต, อากาเส ปุปฺผสนฺถรา;
เตน จิตฺตปฺปสาเทน, ตุสิตํ อุปปชฺชหํฯ
[4]
‘‘จตุนฺนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[5]
‘‘ปญฺจปญฺญาสิโต กปฺเป, เอโก อาสิํ มหีปติ;
สมนฺตฉทโน นาม, จกฺกวตฺตี มหพฺพโลฯ
[6]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํฯ
อิตฺถํ สุทํ อายสฺมา อุมาปุปฺผิโย เถโร อิมา คาถาโย อภาสิตฺถาติฯ
อุมาปุปฺผิยตฺเถรสฺสาปทานํ ปฐมํฯ
2. ปุลินปูชกตฺเถรอปทานํ
[7]
‘‘กกุธํ วิลสนฺตํว, นิสภาชานิยํ ยถา;
โอสธิํว วิโรจนฺตํ, โอภาสนฺตํ นราสภํฯ
[8]
‘‘อญฺชลิํ ปคฺคเหตฺวาน, อวนฺทิํ สตฺถุโน อหํ;
สตฺถารํ ปริวณฺเณสิํ, สกกมฺเมน โตสยิํ [โตสิโต (สี.)]ฯ
[9]
‘‘สุสุทฺธํ ปุลินํ คยฺห, คตมคฺเค สโมกิริํ;
อุจฺฉงฺเคน คเหตฺวาน, วิปสฺสิสฺส มเหสิโนฯ
[10]
‘‘ตโต อุปฑฺฒปุลินํ, วิปฺปสนฺเนน เจตสา;
ทิวาวิหาเร โอสิญฺจิํ, ทฺวิปทินฺทสฺส ตาทิโนฯ
[11]
‘‘เอกนวุติโต กปฺเป, ปุลินํ ยมสิญฺจหํ;
ทุคฺคติํ นาภิชานามิ, ปุลินสฺส อิทํ ผลํฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุลินปูชโก เถโร อิมา คาถาโย อภาสิตฺถาติฯ
ปุลินปูชกตฺเถรสฺสาปทานํ ทุติยํฯ
3. หาสชนกตฺเถรอปทานํ
[13]
‘‘ทุมคฺเค ปํสุกูลกํ [ปํสุกูลิกํ (สฺยา. ก.)], ลคฺคํ ทิสฺวาน สตฺถุโน;
อญฺชลิํ ปคฺคเหตฺวาน, ภิยฺโย อุจฺจาริตํ มยาฯ
[14]
‘‘ทูรโต ปน ทิสฺวาน [ปติทิสฺวาน (สี. สฺยา.)], หาโส เม อุทปชฺชถ;
อญฺชลิํ ปคฺคเหตฺวาน, ภิยฺโย จิตฺตํ ปสาทยิํฯ
[15]
‘‘เอกนวุติโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, พุทฺธสญฺญายิทํ ผลํฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา หาสชนโก เถโร อิมา คาถาโย อภาสิตฺถาติฯ
หาสชนกตฺเถรสฺสาปทานํ ตติยํฯ
4. ยญฺญสามิกตฺเถรอปทานํ
[17]
‘‘ชาติยา สตฺตวสฺโสหํ, อโหสิํ มนฺตปารคู;
กุลวตฺตํ [กุลวํสํ (สี. สฺยา.)] อธาเรสิํ, ยญฺโญ อุสฺสาหิโต มยาฯ
[18]